No menu items!
20.6 C
Nigeria
Friday, September 24, 2021

Police ‘Olokpa’ Brutality for Naija

Must read

The only thing wey the average Naija people suppose reason when e come to police na say dia job na to protect people and property.

But the problem be say Naija police no dey waste time to give person hot slap even when person no vex dem.

E come be like say all Naija people na criminals for olokpa dia eyes.

No be today all this police bad behavior start.

Many people still remeba when military hold power for Naija. Dat time, Baba Fela use di matta take sing plenty song before him kick bucket.

In recent times, e be like say di issue don bad pass before because some bad policemen no mind to use dia boot, belt and that dia stick ontop your head for no reason and if you dey dat position, you go begin think of frog-jump without instruction.

Naija police headquarters

To settle dis matter, e get some question wey we need to ask;

  1. Why police people like to vex for di same citizens wey dem suppose to protect?
  2. Why dem too dey use dia gun to threaten people?
  3. Make you no try speak big grammar for police because na sure ticket for slap be that
  4. Why police people no dey like to discipline dia officers wey fuck-up?

If we continue, the questions no go end because everybody for Naija don get this bad police behavior experience, one way or another.

First of all, Nigerians like to dey intimidate one another (any small thing, person go ask ‘Do you know who I am?’).

All dis kind things start from di time wey military dey in power, although di army/soldiers don comot hand for dis kind yama-yama but police no gree repent and di thing com make people no like dem at all.

Naija Sojas

E no get the kind badness wey police people no dey put hand inside.

From lie-lie, to lack of professionalism, to corruption, and many oda things. Na some of di issues wey follow dey cause dia problem be dis.

E reach where Naija youths come gada tok say dem no want SARS again.

Youths for Naija gada do protest for many states for Naija for 2020. The protest chop people life as govament send Sojas dem to shoot people for Lekki Toll Gate.

Dat na because tok-tok people for TV, radio and newspapers begin expose some of the nyama-nyama actions of police.

Plenty people protest, na him di federal govment come change SARS to FSARS.

Everybody begin wonda how di personal attitude go change just by changing di name of the police unit.

Dat same thing don happen before when govment comot ‘force’ from di name of Nigeria Police (Force) because govment think say na that name dey make dem to do everything by force.

Until today, the force wey govment remove from dia name still dey inside di officers body.

But make we talk true for dis issue, no be only police go carry dis blame.

Di people wey dey do police recruitment, training, retraining especially di kind of training wey oyibo call ‘intelligence gathering’ must also follow take inside the blame.

Dis na sake of say dem no dey use clean hand do all dis things, dat na why people wey no qualify dey find dia way get work for police.

On top all dis, some of the top police dem oga dey use junior police officers to make money, especially to do security for private businessman and woman.

If you go like to read the English version, make you click on the link below.

https://www.linkedin.com/pulse/police-brutality-nigeria-ogechi-iwe-ugbaga

More articles

1 COMMENT

LEAVE A REPLY

Please enter your comment!
Please enter your name here

- Advertisement -

Latest sabi contents