Tori wey dey reach us from Lagos be say, passenger stab UBER driver for Agungi area of Ajah, Lagos state.
Adewale di UBER driver, report say Laura him passenger stab am with bottle for hand.
Him carry Ms. Laura from Ajoa estate come carry her go Agungi.
As dem reach, to pay money come turn wahala as Ms Laura yan say her mobile app no dey work based on network palava.
Ms Laura come enta her friend house collect ‘urgent 2K’ to take pay UBER driver but him no gree collect as him money na N4,100.
Mr Adewale come suggest say make dem go ATM withdraw him balance but Ms. Laura no gree.
Before dem know wetin dey happen, argument burst. Ms Laura come burst bottle chuk Mr Adewale for hand.
Security man wey confam di tori yan say, na sleep him dey sleep, when him hear noise for outside.
As him comot, driver don get injury for hand, dey bleed ontop.
Di mata pass di security man power.
Na wetin make him go call Ms Laura friend (Blessing) wey she come visit, to see di major problems wey her padi don cause.
Di state police public relations officer, CSP Adekunle Ajisebutu, tok say police don detain Ms. Laura and di command don begin to investigate.