Nigerian Medical Association (NMA) don issue 21 days ultimatum for Federal Govament to settle all di mata wey dem get with di National Association of Resident Doctors (NARD), Medical and Dental Consultants Association of Nigeria (MCAN) and oda members.
Dis na part of wetin NMA agree for dia National Executive Council (NEC) meeting for Benin City.
“Afta we don consider finish, NEC don give federal govament 21 days to answer all di issue dem agree with affiliate members of di Nigerian Medical Association (including MDCAN, MEDSABAMS and NARD).”
Dis na according to di statement of di President, Prof Innocent AO Ujah and secretary, Dr. Philips Uche Ekpe.
“If FG no do wetin we don agree afta 21 days, NMA go do emergency delegate meeting to see how far dem don go and know wetin to do next”. na part of wetin di NMA talk for dia meeting.
Chris Ngige, wey be di Minister of Labor and Employment yarn say if NARD no take time, dem go do dem ‘no work, no pay’.
All dis one no concern NMA as dem say na di doctors and oda health workers dem dey support.
“Di Nigerian Medical Association dey behind all her affiliate as dem want make healthcare for Naija dey better”.