EXCLUSIVE: How we take survive Ukraine-Russia war — Students

Date:

Ukraine, eastern Europe, na kontiri wey get one of di cheapest tuition fees compared to U.S., Canada and oda’s.

Before, Russia and Ukraine na one kontiri but on 24 August, 1991, Ukraine declare say dem be independent kontiri.

Map showing Ukraine and Russia.
Map showing Ukraine and Russia.

But di fight to re-capture Ukraine come start on 24 February, 2022, as Ukraine been wan join NATO.

Russian presido Vladmir Putin, declare war on Ukraine. Him also warn oda kontiri’s say make dem no interfere in di war.

Russian President Vladmir Putin.
Russian President Vladmir Putin.

Most countries condemn di invasion of Ukraine as several countries dem, try to evacuate dem people from di kontiri.

Naija govament also try dem best to evacuate ova 250 citizens from di war zone.

Toluwani Bankole, one of our kontiri people, enta Ukraine to study medicine as e be say our education sector for Naija get plenty pot holes.

Unfortunately for her and her six friends, di Ukraine-Russia war, nab dem for there.

Ms Bankole grant EYESABI exclusive details to how she and her friends, take survive during di bombings and how she take waka enta another kontiri, Hungary.

“As Naija student wey dey study medicine for Ukraine, dem get very cheap school fee and di lecturers dem dey make am easy,” Ms Bankole yan.

On to di war, she tok say dem been hear small rumor say kasala go burst.

“We been hear rumor say war go start since mid-January 2022. Di mata come serious for February.

“Me and some of my friends start to find as we go take comot Ukraine. First we say make we carry train japa go Poland, but di people for there tok say di train no go quick come.

“By dis time, Russia don dey trowey bomb and di war begin serious. So we change mind say make we go Lviv, from der, we go enta Poland.

Picture from di Ukraine-Russia war. [CREDIT: NBC News]
Picture from di Ukraine-Russia war. [CREDIT: NBC News]

“Mind you, di road to all this places dey free as majority of people don already start to run comot from Ukraine.

“Me with my friends try go anoda train station wey go connect us to Lviv. As we reach di border for Poland, we come hear rumor say plenty people don choke Poland and dem no go allow people enta again.

According to Ms Bankole, life nearly taya dem as dem sleep for outside for four days wey cold fire dem.

“We stay for di border up to four days, as we no know wetin to do. We come tok say make we go Slovakia as we hear say di people don open dia own border.

“To reach slovakia we go need take train from Urzhhorod. So we check for train wey go reach Urzhhorod and we see one for 5:32pm and time na 5:20pm already.

“As we try rush collect ticket, dem say ticket no be free again. Before we finish for queue for di ticket, di train don already move.

NO FOOD, COLD HAMMA US

Ms Bankole and her friends journey don dey taya dem. To comot Ukraine come dey be like ‘Israelite journey’.

“We don already taya as we spend days ontop dis mata. No food, cold don beat us taya.

“We decide to enta any train. From there we go dey find our way as we no wan just stay Ukraine.

“Di train wey we enta dey go Kovel.

Nothing concine dis stroy and dis train but we just use am to explain part of dis story.
Nothing concine dis stroy and dis train but we just use am to explain part of dis story.

“As we dey road to Kovel, we hear from our people say for Slovakia border, di people for there dey pick old people, people wey get belle and, those wey get pikin before dem ansa young people.

“Dis one just make us tire, as we argue between our self we agree say make we go Lviv.

“As we reach our stop we carry train wey dey go Lviv. As we finally reach Lviv, some Naija people run come meet us say space nor dey and dem wan go back Urzhhorod. Naso we join dem, for inside di train as we hear say Poland self no dey allow people.

TRIP TO SAFETY

“We reach Uzhhorod on Sunday as we comot Kovel on Friday. Hunger don ova beat us, so we make up our mind to go Romania or Slovakia border. We make up mind say Slovakia own go beta.

“We call taxi wey go carry us go Slovakia border as we enta tell am wia we dey go, di taxi man tok say na there he dey come. Instead make he carry us go chop.

“Seven of us come go chop, from there, we buy ticket to Zahony one town for inside Hungary.

“We no spend one hour for road. As we reach Zahony, di customs for there welcome us well, stamp our tickets come give us free ticket to Budapest.

Picture wey dey show taxi for Budapest.
Picture wey dey show taxi for Budapest.

“Di train to Budapest dey very comfortable and neat and di journey to Budapest na six hours from Zahony.

“As we reach Budapest, one of us get person for di kontiri. Na dis person help us from di train station reach one hostel wey we stay.

“From there we find Immigration go. Na so we collect one month temporary visa.

Eye Wey Sabi
Live your happiest life. Pray to God and be kind to others. Hit me up on Twitter @GarnishMaster.

LEAVE A REPLY

Please enter your comment!
Please enter your name here

Share post:

Subscribe

spot_imgspot_img

Popular

More like this
Related

ASUU strike: Make parents join govament beg di union – Garba Shehu

ASUU strike: Make parents join govament to beg di union - Garba Shehu

Insecurity: Na only heaven get peace of mind – Festus Keyamo

Insecurity: Na only heaven get peace of mind - Festus Keyamo

Naija Tobi Amusan set anoda world record for 2022 commonwealth games

Naija Tobi Amusan set anoda world record for 2022 commonwealth games

VIDEO: Mr Eazi – Personal Baby

VIDEO: Mr Eazi – Personal Baby
%d bloggers like this: